Арал ауданының Төтенше жағдайлар бөлімінің ұйымдастыруымен 2026 жылғы 22 сәуір күні орман-дала өрттерінің алдын алу және оларды жоюға бағытталған кешенді оқу-жаттығу өткізілді. Аталған іс-шара өрт қауіпті кезеңде қауіпсіздікті қамтамасыз ету, төтенше жағдайларға жедел әрі үйлесімді әрекет ету деңгейін арттыру мақсатында ұйымдастырылды. Оқу-жаттығуға Арал ауданының төтенше жағдайлар қызметкерлерімен қатар орман шаруашылығы мекемелері, азаматтық қорғау қызметтері және Барсакелмес мемлекеттік табиғи қорығының қызметкерлері белсенді қатысты. Қорық мамандары табиғи аумақтарды қорғау, сирек кездесетін өсімдіктер мен жануарлар дүниесін сақтау бағытындағы тәжірибелерімен бөлісіп, өрттің экожүйеге тигізетін зардаптарын азайту жолдары бойынша өз ұсыныстарын ұсынды. Іс-шара барысында шартты түрде туындаған өрт ошағын анықтау, оны оқшаулау және толықтай жою бойынша практикалық жұмыстар жүргізілді. Қатысушылар арнайы техника мен құрал-жабдықтарды тиімді пайдалану, күштер мен құралдарды дұрыс үйлестіру, сондай-ақ жедел әрекет ету алгоритмдерін пысықтады. Барсакелмес қорығының қызметкерлері дала жағдайында өртті сөндірудің ерекшеліктерін, соның ішінде жел бағыты, өсімдік жамылғысының түрі мен жер бедерінің әсерін ескере отырып әрекет ету тәсілдерін көрсетті.
Сонымен қатар, оқу-жаттығу барысында байланыс жүйесінің тиімділігі, ақпарат алмасу жылдамдығы және әртүрлі қызметтердің өзара іс-қимылы сыналды. Бұл өз кезегінде төтенше жағдай туындаған жағдайда барлық құрылымдардың бірлесе отырып, үйлесімді жұмыс істеуіне мүмкіндік береді.
Жалпы алғанда, өткізілген оқу-жаттығу орман-дала өрттерінің алдын алу мен оларды жоюдағы дайындық деңгейін арттырып, қатысушы мекемелердің тәжірибесін нығайтты. Барсакелмес мемлекеттік табиғи қорығы қызметкерлерінің қатысуы табиғи аумақтарды қорғау ісінде мұндай бірлескен шаралардың маңыздылығын тағы бір мәрте дәлелдеді.