🔹Құмтышқандардың ең ірісі. Дене тұрқы – 17-20 см, салмағы – 180-250 г. Құйрығы ұзын, денесінің ұзындығымен бірдей немесе кішкене қысқа, ұшында қара шаштан шашағы бар. Денесінің жоғарғы жағы сұр реңктері қосылған жоса-құмды түсті, астыңғы жағы – ақшыл немесе сары түс қосылған күңгірт-сұр.

Негізгі мекендеу ортасы – сексеуілден, жүзгіннен және басқа да бұталар мен шала бұталардан тұратын өсімдік жабыны бар шөлдер мен шөлейттердегі құмды, саз және саз-құмды учаскелер. Көбінесе күндіз белсенді; қыста кішкентай аң аса белсенді болмайды және індерінен аз шығады. Қауіп төнген кезде құмтышқан тігінен тұрып, созылыңқы дыбыс шығарып немесе ысқырып, кейін ініне кіріп кетеді. Құмтышқандар бұталардың (сексеуілдің және басқалардың) бұтақтарын немесе өсімдіктердің жасыл бөліктерін індеріне тасып немесе биіктігі 50 см дейін үстіне үйіп қойып, азығын қысқа қамдайды.